«ЕЛ ҚОРҒАНСЫЗ, ЕР ОТАНСЫЗ БОЛМАС»
Бауыржан Момышұлы атындағы Алматы республикалық «Жас ұлан» мектебінде «7-мамыр — Отан қорғаушылар күні» мен «9-мамыр — Ұлы Жеңіс күні» мерекелеріне орай салтанатты іс-шара өткізілді.
Кешегi сұрапыл соғыстың iзiн суытып, жеңістің туын көтерiп, халкымызға қуаныш әкелген Ұлы Жеңiсiмiздi куанышпен тойлағанымызға бүгiн, мiне, 76 жыл! Ел халқына шат-шадыман күлкі мен тыныш өмір сыйлауда әскерлеріміз бен батыл азаматтарымыздың атқарып жатқан қызметтері ұшан-теңіз. Армиямыздың айбынын асқақтататын сардарлар мен сарбаздарымызға қандай кұрмет көрсетсек те жарасымды.
Ұжымның қыз-келіншектері ұйымдастырған мерекелік іс-шараны мектеп бастығы полковник Батырбаев Манат Болатұлы мектеп ұжымын құттықтау сөзімен ашты. «Бұл мереке — батылдық пен ерліктің, қаһармандық пен елдіктің нышаны. Отанға деген сүйіспеншілік пен адалдықтың өлшемі. Ата-бабаларымыздың арқасында бүгінгі күні өз тәуелсіздігімізді алып, егеменді ел болып, әлемге танылып отырмыз. Бұл біз үшін үлкен қуаныш, үлкен бақыт. Елімізде бейбітшілік болсын! Айбынды азаматтарымыз аман болсын!» деп ізгі тілегін білдірді.
Салтанатты жиын мектептің қыз-келіншектері ұйымдастырған концерттік бағдарламаға жалғасып, ұжымның ер азаматтарына керемет мерекелік көңіл-күй сыйланды.
Ұлы Отан соғысында туған елін қорғаған ардагерлеріміз аман болып, Қарулы күштеріміздің әрқашан да айбыны асқақ, мерейі үстем, жауынгерлік даярлығы жоғары болсын, өйткені мемлекетіміздің бүгінгі бейбіт өмір сүру жолында жасаған әрбір қадамы — болашақта желбірейтін Мәңгілік Елдің туы екенін ұмытпайық!
Тәрбие бөлімшесінің бастығы Г.Кадыркулова
