Республиканская школа "Жас улан" им. Б. Момышулы
Бауыржан Момышұлы атындағы Алматы республикалық «Жас ұлан» мектебінде осыдан 35 жыл бұрын адамзатқа орны толмас қасірет әкелген Украинаның Чернобыль қаласындағы атом электр станциясында болған жарылыс туралы дөңгелек үстел ұйымдастырылды. Оның басты мақсаты – аталған апатының салдарын жоюға аттанған сарбаздардың ерлігін насихаттау.
Шараға «Чернобыль апаты» ұйымының құрметті төрағасы Рахим Әбдікарімов, Чернобыль апатына және Ауған соғысына қатысқан ардагерлер Александр Горелкин, Талғат Бисимов, Нұрлан Ибрагимов және Сергей Курьин қатысты. Дөңгелек үстел барысында Чернобыль апатының тарихы туралы, апат зардабын жоюға қанша қазақстандықтар жұмылдырылғандығы және тағы да басқа өзекті мәселелер төңірегінде әңгіме өрбітіліп, жарылыс алаңына елімізден аттанған ерлігі мәңгі өшпес жауынгерлерді бір минут үнсіздікпен еске алды.
Апат зардабын жоюға нақты қанша қазақстандықтың қатысқаны әлі белгісіз. Дегенмен де, Ресей ақпарат құралдарында «Апатты залалсыздандыруға 1986-1992 жылдарда қатысқан адамдардың саны 600 мыңнан асқан екен. Олардың ішінде ресми тізімде 31743 қазақстандық тіркелген» деген деректер бар. Олар өртті дереу сөндіру, тұрғындарды жаппай эвакуациялау, радиацияның таралу ауқымын азайту секілді жұмыстарды абыроймен атқарды.
— Осыдан 35 жыл бұрын Чернобыльдағы жарылыс әлемді дүр сілкіндірді. Бұл апатты залалсыздандыруға Кеңес Одағы бойынша 276 әскери бөлім қатысқан. Олар өз денсаулығы мен өмірін қиып, украин халқының басына ауыр күн туғанда қасынан табылып, көмек көрсетіп, бір кісідей жан аямай ат салысты»-деп апат алаңында өткен ауыр күндерін еске алды, — деп атап өтті «Чернобыль апаты» ұйымының құрметті төрағасы Рахим Әбдікәрімов.
Мектептің медициналық пункт бастығы капитан Тимур Жұмабаев радиацияның адам ағзасына әсері, радиация адам организміне енгенде қандай биохимиялық процестер жүретіндігі туралы айтты. Бұдан кейін мектеп жеке құрамына осы ірі апат туралы түсірілген деректі фильм көрсетілді. Бүкіл адамзаттың қасіретіне айналған Чернобыль апатының салдары адамзатқа әлі күнге дейін зардабын тигізуде. Оның салдарын жоюға қатысқан біздің мыңдаған отандастарымыздың ерлігін бүгінгі ұрпақ еш уақытта ұмытпайды.